Уҡытыусы ҡиммәттәре

         (Аҡмуллаға эйәреп) 

 

Беренсе ҡиммәт нәмә – ул уҡыусы,

Һинең күҙгә өмөт менән ул бағыусы,

Шул өмөттө аҡламаһаң, яҡламаһаң,

Ни фәтүә булыу менән уҡытыусы?

 

Икенсе ҡиммәт нәмә – ул ҡот, тигән,

Күңеле таҙа булғандар гел ҡот йыйған,

Хеҙмәт һөйөп, балаларҙы яратҡандар

Донъяһына һис көттөрмәй йәм-ҡот ҡунған.

 

Өсөнсө ҡиммәт нәмә – ышаныстыр,

Уны яулау мөғәллимгә ҡыуаныстыр.

Һөнәренә тоғро булып, намыҫ менән

Эшләгәндәр өсөн хеҙмәт йыуаныстыр.

 

Дүртенсе ҡиммәт нәмә – ул тырышлыҡ,

Тырышһаң, эшең алға барыр,  ҡарышыу юҡ.

Тырышҡан – ташҡа ҡаҙаҡ ҡаҡҡан, тип,

Юҡҡа ғына әйтмәгән бит беҙҙең халыҡ.

 

Бишенсе ҡиммәт нәмә – ынтылыуҙыр,

Яҡшылыҡҡа, камиллыҡҡа  ылығыуҙыр.

Туҡтап ҡалма юлдарыңда – эҙлән, ынтыл,

Камиллыҡтың был донъяла сиге юҡтыр.

​

Алтынсы ҡиммәт нәмә – уҡыу, тигән,

Уҡыу – белем шишмәһе, тип хаҡ әйтелгән.

Юғары белемем бар, тип маһайып

Йөрөү менән белем артмай, дуҫым, белһәң.

​

Етенсе ҡиммәт нәмә – сабырлыҡтыр,

Мөғәллимгә сабыр булыу ҙур байлыҡтыр.

Белем алыу – энә менән ҡойо ҡаҙыу,

Быны аңлау һәр балаға бик тә зарур.

​

Һигеҙенсе ҡиммәт нәмә, дуҫым, - ырыҫ,

Йөҙөң булһын һәр саҡ асыҡ, булма ҡырыҫ.

Хеҙмәтеңдән йәм табырһың, тәм табырһың,

Маҡсатыңа ирешерһең, үтәп бурыс.

 

Туғыҙынсы ҡиммәт нәмә – ул мәктәбем.

Мәктәбемдә үткән һәр бер көнөм, һәр сәғәтем.

Мәктәбебеҙ гөрләп торһон, алға барһын.

Йәш быуынды үҫтереүсе ул дәүләтем.